महोत्तरी – महोत्तरीको भंगहा नगरपालिकाका विपन्न परिवारको जीवनमा नयाँ आशाको किरण पलाएको छ। वर्षौंदेखि कमजोर आवास र अभावबीच जीवन बिताउँदै आएका ७३ गरिब, दलित तथा विपन्न परिवारले अहिले सुरक्षित र व्यवस्थित घर पाएका छन्।

भंगहा नगरपालिका–६, जमुनियाकी रिता देवी सदाको परिवार केही समयअघिसम्म सानो त्रिपालमुनि बस्न बाध्य थियो। 

कमजोर आर्थिक अवस्थाका कारण आफ्नै घर बनाउने सपना उनका लागि टाढाको विषय बनेको थियो। वर्षा, हावाहुरी र चर्को घामसँग संघर्ष गर्दै बालबालिकासहित दिन बिताइरहेकी रिता देवी अहिले भने आफ्नै सुरक्षित घरमा बस्न पाएकी छन्।

घर प्राप्त भएपछि उनको जीवनमा मात्र होइन, बालबालिकाको भविष्यमा पनि सकारात्मक परिवर्तन आएको छ। पहिले असुरक्षित वातावरणमा हुर्किरहेका बालबालिका अहिले नियमित रूपमा विद्यालय जान थालेका छन्।

भंगहा नगरपालिका–४, बनरा टोलकी सुमिन्त्रा सिंहको अवस्था पनि फरक थिएन। घर नहुँदा वर्षायाम सुरु हुनासाथ उनको परिवार चिन्तित हुन्थ्यो। बालबालिकासहित खुला आकाशमुनि बस्नुपर्ने बाध्यता थियो। तर अहिले उनको परिवारले पनि सुरक्षित आवास पाएको छ, जसले उनीहरूको जीवनमा स्थायित्व र आत्मविश्वास थपेको छ।

रिता देवी र सुमिन्त्रा सिंह त प्रतिनिधि पात्र मात्र हुन्। भंगहा नगरपालिकाभित्रका ७३ परिवारले सुरक्षित घर पाएपछि उनीहरूको जीवनस्तरमा उल्लेखनीय सुधार आएको छ। उनीहरूका लागि यो परिवर्तन केवल घर निर्माणमा सीमित छैन, बरु सम्मानपूर्वक र सुरक्षित रूपमा बाँच्ने आधार बनेको छ।

भंगहा नगरपालिकाको समन्वयमा Good Neighbors International ले सञ्चालन गरेको आवास सहयोग कार्यक्रमअन्तर्गत यी परिवारका लागि घर निर्माण गरिएको हो। संस्थाले विपन्न परिवारको अवस्था पहिचान गरी उनीहरूको आवश्यकता अनुसार सुरक्षित आवास निर्माणमा सहयोग पुर्‍याएको हो।

आवास निर्माणसँगै बालबालिकाको शिक्षालाई पनि प्राथमिकता दिइएको छ। आवश्यक शैक्षिक सामग्री तथा अन्य सहयोग उपलब्ध गराइएपछि विपन्न परिवारका बालबालिकाको अध्ययनमा सहजता आएको छ।

सामाजिक क्षेत्रमा सक्रिय गुड नेवर्स इन्टरनेशनलको यस पहलले स्थानीय स्तरमा व्यापक प्रशंसा पाएको छ। संस्थाले विपन्न परिवारलाई केवल तत्कालीन राहत उपलब्ध गराउने मात्र नभई दीर्घकालीन समाधानतर्फ उन्मुख प्रयास गरेको भन्दै स्थानीयवासीले सकारात्मक प्रतिक्रिया दिएका छन्।

कुनै समय वर्षाको पानी र असुरक्षित बासस्थानबाट बच्न संघर्ष गरिरहेका परिवारहरू आज आफ्नै घरमा सुरक्षित जीवन बिताइरहेका छन्। उनीहरूको अनुहारमा देखिएको खुसी र आत्मविश्वासले स्पष्ट देखाउँछ—सहयोग, सहकार्य र सही पहलले समाजका कमजोर वर्गको जीवनमा वास्तविक र दिगो परिवर्तन सम्भव छ।